Parolez Ido

La mulier-futbalo mond-championeso en Germania 2011

Kara amiki!

Ja balde komencos la mulier-futbalo mondchampioneso en Germania. Me volas
informar kurte pri ca evento en Ido. Quale vi certe savas en la linguo Ido la
amba sexui esas linguale egalyura en la difero a multa nacionala lingui ed
Esperanto. La historio di la mulier-futbalo esis longa kombato pri egalyureso e
publika agnosko.

Ye ca saturdio komencos la sisesma mulier-futbalo mond-championeso en Germania.
La turniro eventos inter la 26esma di junio e la 17esma di julio. 16 esquadi
konkursos pri la titulo. La hosto Germania esas la favoritini pro ke la esquado
da trenerino Silvia Neid ganis la recenta du championesi en la yari 2003 e 2007.
La maxim granda konkurencantini di la Germani esos la esquadi di la Unionita
Stati di Amerika e di Brazilia. Anke la Usa triumfis dufoye en la
mond-championesi (1991 e 1995). Du nacioni ludos por la unesma foye en la
mond-championeso: Kolumbia e la mikra afrikana stato Equatorala-Guinea.

La 16 landi ludos en quar grupi po quar esquadi. La maxim du bona landi di omna
grupo atingas la quarimo-finalo. Pos la pre-rondo la turniro exekutesas en
pokalo-modo til la finalo. En la grupo A di la pre-rondo ludas la granda
favorito Germania, Kanada, Francia e Nigeria. En la grupo B esas Anglia,
Japonia, Mexikia e Nov-Zelando. La duesma granda favorito Usa ludas en la grupo
C kun Svedia, Nord-Korea e Kolumbia. Finale en la grupo D ni trovas la triesma
favorito Brazila same kam Australia, Norvegia e la maxim exota esquado
Equatorala-Guinea.

La 32 ludi eventos en non stadioni. La urbi di la mond-championesi esas
Augsburg, Berlin, Bochum, Dresden, Frankfurt am Main, Leverkusen,
Mönchengladbach, Sinsheim e Wolfsburg. La inaugurala ludo inter Germania e
Kanada eventos en la Olimipiala Stadiono en Berlin e la finalo en la nova
stadiono di Frankfurt.

La Germana Futbalo-Asociuro aranjis grandega reklamo-kampanio en la medii por
levar la intereso pri la muliero-futbalo en Germania. Por destruktar la olda
prejudiko ke nur leta amazoni qui aspektas quale viri ludas futbalo, sis germana
futbalistini mem permisis ke la viri-jurnalo "Playboy" fotografis eli nude. La
fotografuri publikesis dum ica monato en Germania. On kreis ludilo-pupei qui
aspektas quale la trenerino Silvia Neid a la esquado-kapitanino Birgit Prinz.
Por la unesma foyo la italiana firmo "Panini" vendas kolekto-albumo por imaji di
la futbalistini de omna partoprenanta esquadi. La germana televiziono montros
omna ludi di la mond-championeso direte.

Ma la futbalo, qua esas sen dubito la maxim populara sporto en Germania, esis
longe afero nur por viri. Inter 1955 e 1970 la Germana Futbalo-Asociuro oficale
mem interdiktis futbalo por mulieri en sua klubi. La ridinda justifiko esis ke
la futbal-sporto deformas la feminina korpo(!). Erste en la yaro 1974 aranjesis
la unesma oficala germana championeso en la mulier-futbalo. Ye la yaro 1982
eventis la unesma oficala internaciona ludo di la germana nacionala esquado di
mulieri kontre la Suisia en Koblenz. En la yaro 1989 la germana esquado ganis
por la unesma foyo la europ-championeso. Til hodie Germania ganis sisfoye la
titulo di la maxim bona esquado di Europa. To signifikas ke la germana
futbalistini esas plu sucesoza kam la viro-esquado. Ma inter la 6,7 milioni
aktiva membri di la Germana Futbalo Asociuro esas nur 1,2 milioni mulieri e
yunini.

Views: 44

Reply to This

Replies to This Discussion

Thomas,

Danko pro savigar da ni la balde eventonta Futbal-konkurso en Germania. Anke esas interesiva saveskar pri la esforco di atleto-mulieri, precipue futbalisti por ganar egala traktado de la komuneso sportala. Me nur dicas: Adavane mulieri futbolista di la mondo!

Kara Kiran.  Tua patrio esas ja longe centro di la mulier-futbalo. Me lektis ke en la Usa on konsideras futbalo plu kom sporto por yunini e la pueruli preferas la amerikana futbalo (simila al britana *rubgio).  Ka to esas vera?

Thomas,

To quon vu dicas forsan esus justa. Me ne savas plu multe pri la stando di mulier-futbalo en la Usa. Ma, yes, generale futbalo ne konsideresas kom la maxim favorata sporto ibe. Beisbol, basketbalo, e 'Football' Usana reklamacas ta honoro. Tamen, dum recenta yari, pro diversa motivi, la populareso di futbalo en la Usa kreskas. Lo esas vera anke por mulier-futbalo.

Reply to Discussion

RSS

Forum

Quale esas la vetero en vua loko ca-die?

Started by Marcus Trawick in Generala diskuti. Last reply by João X. M. Santos Aug 25, 2016. 1 Reply

Esperantisto rituale brulas Idisto(-figuro)

Started by William in Ido. Last reply by Rachel "Wil Sha" Morris Apr 5. 2 Replies

Idolinguo bezonas Duolingo por difuzar ol

Started by Johnathan in Ido. Last reply by Johnathan May 29, 2016. 9 Replies

Anki flashcards for Ido

Started by Brian E. Drake in Ido. Last reply by Kiran Feb 28, 2016. 1 Reply

© 2017   Created by Tiberio.   Powered by

Report an Issue  |  Terms of Service

border