Kelka novajeti del duesma duimo di junio 2010

[Gabriel Svoboda]

DE USA
— 16ma di junio 2010: Multi kredas, ke Usa atakis Irak ne por kombatar terorismo, ma pro la petrolo lokal. Ma recente li deskovris, pro quo Usa atakis anke Afganistan. Afganistan ne havas tanta petrolo, ma ol havas richajo enorma di minerali valoranta plu kam un trilion (10¹²) dolari: fero, kupro, kobalto, oro e litio.

DE NORD-WEST-EUROPA
— 16ma di junio 2010: Diluvio rapida, kauzo di qua esis pluvego, en la departmento di Var alonge la Rivo Azurea, sud-Francia, ocidis adminime 25 homi.

DE SUD-EST-EUROPA
— 22ma di junio 2010: Pikturi prehistorial piktita ye 23-35 mil yari ante nun deskovresis en la kaverno Coliboaia en la Monti Apuseni, west-Rumania. La kaverno ja konocesis, ma la pikturi ne, nam la kaverno es parte inundata per rivero subtera. La pikturi es simila al pikturi en kaverni west-Europana, montrante bizono, kavalo, du kapi di ursi e du kapi di rinoceri.

DE MONDO NOVA
— 27ma di junio 2010: Alizee Sery, Francianino evanta 25 yari, ofensis l' Aborijeni Australiana per desvestizir su en la somito di Uluru, Nord-Teritorio, Australia, e distributir cinematografuro pri co. Elu defensas su, ke co ne intencesis kom ofenso dil Aborijeni, ma kom laudo di lia kulturo, nam li ya vivis nuda. Uluru esas monolito gresa reda sakra por l' Aborijeni.

DE EST-AZIA
— 28ma di junio 2010: Se viro natas nuda en lago ed es nula mulieri cirkume vidanta il, kad il agas mal-more? La respondo diferus en parti diferanta dil mondo. En Yushi, sud-west-*China, to divenis temo di debato, pro ke viri uzas rezervuyo lokal tale dum kin yari. Eruditi dicas, ke lego *Chinana egardas nur expozo flagranta kom krimino.

DE SUD-WEST-AZIA ED AFRIKA
— 28ma di junio 2010: Pro l' atako recenta kontre la navo Turkiana dal armeo Israelana en la Maro Mediteranea, Turkia anuncis klozor sua spaco aeral por flugi di aeroplani Israelana.

DE SUD-EST-AZIA
— 29ma di junio 2010: Monako budista Net Khai desengajesis ed akuzesis pro produktado e distributado di pornografio, pro ke il sekrete cinematografis centi de mulieri nuda balnanta en aquo santa di pagodo en Phnom Penh e distributis la cinematografuri per telefonili movebla. To serioze nocis la bona reputeso dil 55 mil monaki budista Kambodjana.

[Gabriel Svoboda]

Danko, Jose! Me anke juas vua Idala Podkasti, e me expektas lo venonta!

[Jose Cossio]

Danko, Gabriel! La novajo pri la Francianino en Uluru esis tre interesanta! Danko pro ca fresha novaji dil mondo!